LA PICCOLA BALLARINNA

La se esibiss lassù,
su la ringhera,
la piccola ballarinna
L'è in de per lee
gh'è no l'orchestra
de la Scala che sona.
Ma lee la balla
Con la musica di so sogn.
La fa andaa i brascitt
con tanta grazia,
i pescitt se mœuven
sempre a temp.
On vell bianch,
ligaa su a la cintura,
el ghe fa la finta
del tutu.
La fa ona piroetta
la se piega,
la ciappa in man el vell,
le fa girà……
…Lago di cigni?
…Coppellia?
E in fin on bell inchin
Al pubblich che gh'è no.
Come l'è bella
La piccola ballarinna,
che faccin sorrident,
quasi ispirà.
Quanta innocenza,
quanti sogn…
Lassom vegnì con tì,
piccola ballarinna,
fasem insemma
on piccol “pas de deux” ,
lassa che perda an'mì
in di to sogni…
vœuri svojà el cervell
e pensà pù ai miseri
de sta vitta de omm…
famm tornà per on moment
on fiolett ch'el balla
cont la morosinna…
Balla, balla per mì,
piccola ballarinna!

CAPORAL MAGGIOR
A PiGi 81enne bersaglier
in occasion de l'avanzament de grado.

Tee savuu? Chi te l'haa dii?
El gh'haa avù l'avanzament
Si, si l'è stà promoss
Dess l'è caporal maggior!
Se te diset? Chissà i scen ?
Chissà come me la menna?
Ma no, dai, te vedarett
Mi l'hoo vist inscì content
El se stima, quest l'è vera
Ma la robba pussee bella
Che le faa stà pù in la pell
A l'è el fatt che finalment
El Lo Cicero, malnatt,
el po' puu, inpunement,
ciamall:” sporco caporale “
Sessantann l'haa sopportà
sbattuu i tacch e signorsì.
Dess a l'è maggior an'lù!
Caporal maggior xxxxxx
Del glorios terz bersaglieri
L'è on onor, per mi, per nun
Festeggiaa la promozzion
E poeu varda, se sa mai.
Che magara trà cent'ann
A te nominen sergent.