Circolo Culturale il Gattopardo
|
|||||||||||
HOME PAGE | IL GATTOPARDO | POESIE | RACCONTI | DIALETTALI | CONCORSI | LIBRI | GLI AUTORI | NEWS ARTE | INFO | CONTATTI | LINK |
DIALETTALI (Dialetto Napoletano)
|
||
http://artista.ilcannocchiale.it/ |
Luciano Somma |
Le Poesie di Luciano Somma |
PREGHIERA
Madonna Addulurata tu che saje tutt''e peccate mieje, Madò, perdoname, maje, comme a stu mumento aggio creduto che 'a copp''a tutt''e ccose ce staje tu! Perdoname si t'aggio jastemmato quanno, assaggianno 'o ffele m'arraggiavo, perdoname, si dint''a casa 'e Ddio io, pe tant'anne, nun ce so' venuto. Ma 'o core tujo c'aonna sempe 'e bbene cu' nu manto 'e celeste ha arravugliato 'a casa mia e io senza fa nu vuto, 'a te 'a cchiù bella grazia l'aggio avuto. Nennella, 'a figlia mia, steve murenno, e jastemmavo sempe 'a notte e 'o juorno e quase, quase mo metto scuorno ca l'he salvata, oi Mamma Addulurata. Mò addenucchiato 'nnante 'e piede tuje p''a primma vota dint''a vita mia, ddoje lacreme me 'nfonneno 'sta faccia mentre sto recitanno <Ave Maria> E dint''o scuro 'e chesta chiesia antica na voce me risponne: <Te ringrazio!> |
NEMICA Vurria sapè pecchè 'ncoppa stu munno l'ammore dura sulo nu mumento e pò fernì, pe' scennere 'int''o funno, p'addeventà ritratto 'e nu turmiento. Tant'anne fa nascette, acqua e sapone, semplice, prufumava 'e giesummine, ogge è pioggia, tempesta, n'alluvione, d''e rrose rosse so' rimaste 'e spine. Dint''a chist'uocchie tuoje tiene 'o ccianuro quanno me guarde ce veco 'o vveleno, p'arraggia spisso faccio capa e mmuro senza sapà maje mettere nu freno. Si vuò chiammela vita chist'inferno addò s'è fatto 'e cennere nu bbene annascunnuto ormaje d''o Pataterno che ci'ha lassato 'o ggelo dint''e vvene. Ogne juorno che passa cchiù luntane comme 'o cielo d''a terra, e stammo aunite, 'e vvote sta natura comm è strana, fa crescere e pò spartere ddoje vite. Si me cunsiderasse almeno frate... pure chesto pe tte costa, è fatica! Che ne parlammo a fa, tiempo sprecato, tu si pe me, e sarraje, sempe nemica! da CRISTO NAPULITANO
Ed.I MIEI COLORI- Pontassieve(Firenze)2000 |
Mancava nu mese a Natale Napoli 23 Novembre 1980
Mancava nu mese a Natale Filuccio sunnava 'o presebbio Assunta penzava 'a befana Nannina filava e cantava attuorno che cujeta ce steve pareva 'e sentì già ' a nuvena... Sta ggente mo è sola nu cunto suspesa tra 'o cielo e na terra ch'ha avuto cchiù lutte 'e na guerra rusarie 'e ferite arapute na scossa l'è stata fatale mancava unu mese a Natale... |
PACE NUN PO 'TRUVA' Vurria pute' stutà 'a televisione e nun leggere cchiù 'ncopp''e ggiurnale nutizie ca me danno nu martirio cu' tanta spine ca me fanno male. vurria campà 'int''a n'isola deserta cu' attuorno 'o mare, sulamente 'o mare, sott''a nu cielo chiaro 'o ppoco 'e rena, vedè ogni tanto 'e vuzze cu''e llampare. Invece stongo dint'a chist'inferno addò cchiù cerca ma nun trovo a Dio addò è arrussata pure l'acqua santa. Pace nun pò truvà stu core mio. da CRISTO NAPULITANO
Ed.I MIEI COLORI- PONTASSIEVE(Firenze)2000 |
'O PRIMMO 'E SETTEMBRE
Ll' urdemo suonno d'Austo se sceta c''o primmo 'e Settembre, stasera è n'incanto! 'O cielo è amaranto, na rèfola 'e viento doce comme 'a carezza 'e nu bbene amara comm 'o ffele d''o chianto me porta na chiorma 'e penziere ch'affollano 'a mente e metteno ncroce stu core. Vurria ca chiuvesse e nun chiove... vurria tanta nuvole attuorno ma 'a luna è d'argiento... Vurria ca nu suonno turnasse ma 'o suonno nun torna. Stu suonno è partuto 'ncopp''a ll'onne 'e ll'urdema sera d'Austo lassannome nu grappolo 'e stelle miez''a nu cielo amaranto 'int''a sta sera 'ncantata d''o primmo 'e Settembre. TRADUZIONE IL PRIMO SETTEMBRE L'ultimo sogno d'Agosto si sveglia col primo Settembre, questa sera è un incanto! Il cielo è amaranto, uno spiffero di vento dolce come la carezza d'un bene amaro come il fiele del pianto mi porta una ciurma di pensieri che affollano la mente e metteno in croce questo cuore. Vorrei che piovesse e non piove... Vorrei tante nuvole intorno ma la luna è d'argento vorrei che un sogno tornasse ma il sogno non torna. Questo sogno è partito sulle onde dell'ultima sera d'Agosto lasciandomi un grappolo di stelle lassù nel cielo amaranto in questa sera incantata del primo Settembre. |
ERANO PERLE
Te staje sbattenno comme a' na dannata si addeventata peggio 'e na vajassa è ora d''a fernì sta sceneggiata pirciò assettate, calmate e te passa. Sta vita 'nzieme comme a mmalatia è durata tant'anne, e sta passanno, 'a freva è scesa e resta na buscia che sta cca dinto, 'e core nuoste 'o ssanno! E mo che faje? Te stienne 'ncopp''o lietto facennete venì nu svenimento po' t'arrepiglie e cu' l'affanno 'mpietto me dice ca io nun tengo sentimento. Io già 'a canosco chesta tiritera saccio tutt''e suspire 'e sti lamiente tu tiene 'a faccia tosta 'e sta manèra e cirche 'e 'ntennerì, accussì, 'int''a niente. Io m'aggio miso na curazza acciaro pecchè te saccio bbona, 'a dinto e 'a fora, pirciò nun ce sta a fà cchiù o paro e sparo mo stongo dint''o mio e ce resto ancora. Sti lacrime so' chianto 'e cuccudrillo nun luceno maje d'oro songo 'e ramma chelle ca me pugneveno, e t''o strillo, erano perle dint''all'uocchie 'e mamma! da CRISTO NAPULITANO Ed.I miei Colori Pontassieve(Firenze)2000 |
TRISTEZZA
E'autunno! Mmiez''o nniro-fummo 'e ll'aria p''e vvie 'e sta città senza cchiù verde veco n'albero annuro e attuorno a 'e rame sicche, scheletrite, na chiorma d'aucelluzze appaurate... E' nu lamiento 'o suono, è nu rummore, comme 'mpazzute voleno pe' nu suspiro: ussiggeno... N'accanimento inutile! ...e a uno a uno cadeno 'ncopp'all'asfalto traditore e ummedo d''o marciappiede sulitario e traggico. Vedennele accussì sponta na lacrema 'e na tristezza ca nun se pò credere. Luciano Somma da MUSICA NOVA-Ed.Lo Stiletto-Napoli- 1993 Prefazione di Giuseppe Porcaro ................................................................................. Traduzione E' autunno! Tra il nero-fumo dell'aria per le vie di questa città senza più verde vedo un albero nudo e intorno a i rami secchi, scheletriti, una ciurma di uccellini impauriti. Il suono è un lamento, un rumore, come impazziti volano per un sospiro: ossigeno accanimento inutile! E ad uno ad uno cadono sull'asfalto traditore ed umido del marciapiedi solitario e tragico. Vedendolo così spunta una lacrima d'una tristezza che non si può credere. |
'A LAVAGNA D''A SCOLA 'Ncopp''o banco: l'inchiostro, 'o pennino, nu quaderno a quadretto, 'a marenna; 1 'na guagliona bellella vicino piccerella e accussì cannetella. 2 'Nfacci'a nnuje truneggiava 'a lavagna addò spisso screvevemo 'e nomme cu dduje core e na freccia sulagna ca 'e 'nfezzava astrignennele...e comme! 3 Ma na mano cchiù grossa veneva a levà chilli scritti d'ammore... Che silenzio antrasatto scenneva mmiez'a nuje, dint'a chilli dduje core! E' ricordo? No è storia d'ajere ca pò essere pure 'e dimane fino a quanno ce stà 'int''e penziere 'o calore e 'a carezza d''e mmane... 'A nennella bellella ogge è nonna e pur'io ma cu' n'ata cumpagna, spisse vote però 'o core sonna chillu banco, 'o quaderno, 'a lavagna. Dalla rassegna Antologica POETICA NAPOLETANA FINE NOVECENTO Edizione FERRARO - Napoli- 1987 1 = Marenna: COLAZIONE 2 = Cannetella: CANDIDA 3= 'Nfezzava: Infilzava |
‘O SOLE E ‘O VICO
Là ‘ncoppa ce stà ‘o cielo e ccà stà ‘o vico addò se nasce, cresce e nun se vola addò ‘o muschillo è sempe cchiù nemico e d''a camorra è prufessore ‘e scola. ‘E vvote nun arriva a diciott'anne p''a droga, pe' nu sgarro o pe' na sòla, e ‘o rrusso ‘nterra, dint''e vasce ‘o ssanno, è sango nun è zuco ‘e pummarola. Chesta città cu''a capa ‘int''a cullina cu''e piede ‘nfuse dint'all'acqua ‘e mare è na fotografia p''a cartulina che fa vedè tanta bellezze rare. Ma ‘ncuorpo tene ‘e vierme dint''a panza ca strisceno p''e strade, ‘int''e quartiere, so' pisce piccerille, so' ‘e paranza, songhe gocce ‘e veleno ‘int''o bicchiere. Ellera marcia che s'attacca ‘e mmura, già pe' nu terramoto sfravecate, è chella che fa mettere paura, è na lanterna ‘mmano a sti cecate! Ca po' da' luce sulo ‘a frennesia cercanno ‘o suono ‘e nu mutivo antico ma nun se sana chesta malatia si ‘o sole stà là ‘ncoppa e ccà stà ‘o vico. |
TERZO posto al PRIMO PREMIO INTERNAZIONALE NOIALTRI - POESIA di Pellegrino (Messina) ARIA E’ MARE
Se so' stutate ‘e lluce ‘int''a
nuttata
Si sono
spente le luci nella notte |
E' Natale
'O palpito 'e mille campane che sonano p''a mezanotte 'a gioia che da' st'ammuina anticipa nu quarantotto. Aunite,c''o sciato 'e ll'affetto, ce sta' tutta quanta 'a famiglia e' doce a campa' stu mumento ch'astregna sti core,atturciglia. Miraculo 'e n'attimo 'e pace na sosta pe' l'anzia 'e l'affanno pe' nuje,ca pasture 'e presebbio, avimmo campato nat'anno. Vurria ca stu tiempo nemico putesse ferma' sti minute, sti ffacce,sti vvocche,sti mmane. Na voce ch'allucca:Salute! Chist'uocchie che guardano 'a cimma 'e n'albero addo' l'abbundanza sta dint''e ggranate d''e lluce ch'appicciano 'o ffuoco 'e st'ausanza. Chist'uocchie ca cercano 'o bbene tra mille culure 'e biancale stunate e 'mbriacate p''o vino mo so' lampe 'e vita,e' Natale! |
Tutti i loghi, I marchi registrati di sito e le opere inviate sono proprietà dei rispettivi autori. Ogni altro materiale pubblicato è proprietà dell'Associazione Circolo Culturale IL GATTOPARDO. 9 Agosto 2006 |
t |